ભારતની સમૃદ્ધ સંસ્કૃતિ અને આધ્યાત્મિક પરંપરા વિશ્વમાં આગવી ઓળખ ધરાવે છે. આ સાંસ્કૃતિક ધરોહર માત્ર આપણા ભવ્ય ઇતિહાસનું ગૌરવ જ નથી પરંતુ ભાવિ પેઢીઓ માટે પ્રેરણાનો સ્ત્રોત, જીવનમૂલ્યોનો આધાર અને રાષ્ટ્રના સાંસ્કૃતિક આત્મવિશ્વાસનું પ્રતીક છે. આ અમૂલ્ય વારસાને જાળવીને તેને આધુનિક અભિગમ સાથે નવી પેઢી સુધી પહોંચાડવાના હેતુથી દ્વારકામાં ‘શ્રી કૃષ્ણ સંગ્રહાલય’નું નિર્માણ થઈ રહ્યું છે.

ચાર ધામ પૈકીના એક ધામ, ભારતની પવિત્ર સપ્તપુરીમાં સ્થાન ધરાવતી નગરી અને ભગવાન શ્રીકૃષ્ણની કર્મભૂમિ દ્વારકા આ સંગ્રહાલયના માધ્યમથી આધ્યાત્મિકતા અને આધુનિકતાના અનોખા સમન્વયનું કેન્દ્ર બનવા જઈ રહ્યું છે. ભગવાન શ્રીકૃષ્ણના જીવનદર્શન, દિવ્ય લીલાઓ, માનવમૂલ્યો અને શ્રીમદ્ ભગવદ્ ગીતાના શાશ્વત સંદેશને આધુનિક ટેકનોલોજીના માધ્યમથી જનજન સુધી પહોંચાડવાનો આ પ્રયાસ ભારતીય સંસ્કૃતિની ભવ્યતાને નવી પેઢી સમક્ષ જીવંત કરશે.દ્વારકાધીશ મંદિરથી આશરે 1.6 કિલોમીટરના અંતરે કુલ રૂ. 92.70 કરોડના ખર્ચે વિકસાવવામાં આવી રહેલું શ્રી કૃષ્ણ સંગ્રહાલય રાજ્ય સરકારનો મહત્ત્વાકાંક્ષી સાંસ્કૃતિક પ્રકલ્પ છે.

નવ ગેલેરીઓમાં શું શું હશે?

શ્રી કૃષ્ણ સંગ્રહાલયનું વિશેષ આકર્ષણ તેની નવ થીમ આધારિત ગેલેરીઓ હશે, જેમાં ભગવાન શ્રીકૃષ્ણના જીવનના વિવિધ પ્રસંગો અને તેમના તત્ત્વજ્ઞાનના અલગ-અલગ આયામોને રજૂ કરવામાં આવશે. ભગવાન શ્રીકૃષ્ણના જન્મથી શરૂ થતી આ યાત્રામાં તેમની બાળલીલાઓ, ગોકુલ અને વૃંદાવનના પ્રસંગો, ગોવર્ધન પર્વત ધારણ કરવાની લીલા, કાળિય નાગનું મર્દન અને રાસલીલા જેવા પ્રસંગોને વિશેષ સ્થાન મળશે. આ ઉપરાંત મથુરા ગમન, કંસવધ, સુવર્ણનગરી દ્વારકાની સ્થાપના અને મહાભારતમાં શ્રીકૃષ્ણની નિર્ણાયક ભૂમિકા પણ રજૂ કરાશે. શિલ્પો, ચિત્રો, વિવિધ કળાકૃતિઓ, હસ્તકલા અને પ્રતિકૃતિઓ દ્વારા આ પ્રસંગોને દૃશ્યાત્મક રીતે રજૂ કરવામાં આવશે. પરિણામે મુલાકાતીઓ માટે શ્રીકૃષ્ણના જીવન અને તેમના ઉપદેશોને માત્ર વાંચવા કે સાંભળવા પૂરતા નહીં, પરંતુ અનુભવીને સમજવાની તક ઊભી થશે.

આધ્યાત્મિકતા સાથે આધુનિક સુવિધાઓનો સમન્વય

વિશ્વસ્તરીય સાંસ્કૃતિક સ્થળ તરીકે સંગ્રહાલયનો વિકાસ કરવા માટે માત્ર પ્રદર્શનો પૂરતા નથી; મુલાકાતીઓની સુવિધા અને સુલભતા પણ એટલી જ મહત્ત્વપૂર્ણ છે. આ બાબતને ધ્યાનમાં રાખીને પ્રકલ્પમાં ડિજિટલ માહિતી વ્યવસ્થા, વિઝિટર ડેસ્ક, દિવ્યાંગજનો માટે પ્રવેશની સુવિધાઓ, કેફે, સોવેનિયર શોપ અને સુવ્યવસ્થિત પાર્કિંગ જેવી વ્યવસ્થાઓ ઉભી કરવામાં આવશે.

પ્રવાસન અને સ્થાનિક અર્થતંત્રને મળશે નવી ગતિ

દ્વારકામાં દેશના વિવિધ રાજ્યો ઉપરાંત વિદેશમાંથી પણ મોટી સંખ્યામાં ભાવિકો અને પ્રવાસીઓ આવે છે. દ્વારકાધીશ મંદિર, સમૃદ્ધ પૌરાણિક પરંપરા અને સમુદ્રકિનારો દ્વારકાની વિશેષ ઓળખ છે. જેમાં આગામી સમયમાં શ્રી કૃષ્ણ સંગ્રહાલય પ્રવાસીઓ માટે ધાર્મિક દર્શનની સાથે સાંસ્કૃતિક અભ્યાસ, ઇતિહાસની સમજ અને આધુનિક ટેકનોલોજી આધારિત અનુભવનું કેન્દ્ર બનશે. આવા પ્રકલ્પોથી સ્થાનિક પ્રવાસનને વેગ મળવાની, પરિવહન, હસ્તકલા, સ્થાનિક વેપાર અને આતિથ્ય ક્ષેત્ર સાથે સંકળાયેલા લોકોને નવી તકો મળવાની સંભાવના છે.

The post દ્વારકામાં 92.70 કરોડના ખર્ચે બનશે શ્રી કૃષ્ણ મ્યુઝિયમ,જોઈ લો એ તસ્વીરો કેવું હશે આ મ્યુઝીયમ appeared first on My Samachar.

કાનૂની માપવિજ્ઞાન અને ગ્રાહક બાબતોની કચેરી દ્વારા નવરાત્રી તથા દશેરાના તહેવારો દરમિયાન ગ્રાહકોને મીઠાઈ, ફરસાણ અને અન્ય ચીજવસ્તુઓની ખરીદીમાં વજન અંગે છેતરપિંડીનો ભોગ બનવું ન પડે અને ગ્રાહકોને યોગ્ય વજન મળી રહે તે હેતુથી  તંત્ર દ્વારા સમગ્ર રાજ્યમાં ગત તા.16 અને તા.17 ઓક્ટોબર, 2026 ના રોજ વિશેષ રાજ્યવ્યાપી તપાસ ઝુંબેશ હાથ ધરવામાં આવી હતી.

આ ઝુંબેશમાં સમગ્ર રાજ્યમાં 455 જેટલી મીઠાઇ/ફરસાણ/ડ્રાયફ્રુટની દુકાનો વગેરે પર સામૂહિક ઝુંબેશ રૂપે તપાસણી કરી ગેરરીતી બદલ કુલ 251 એકમો સામે ગુન્હાઓ નોંધી કાયદેસરની કાર્યવાહી કરીને માંડવાળ ફી તરીકે અંદાજે રૂ5,42,000 વસૂલ કરવામાં આવી છે.

આ ઝુંબેશ દરમિયાન કાનૂની માપવિજ્ઞાન તંત્રના મદદનીશ નિયંત્રક તેમજ ઇન્સપેક્ટરો દ્વારા રાજ્યની મીઠાઇ/ફરસાણ/ડ્રાયફ્રુટની દુકાનો પર તંત્રના કાયદા અને નિયમોની જોગવાઇઓનો ભંગ કરતા એકમો સામે કાયદેસરની કાર્યવાહી કરવામાં આવી છે. નવરાત્રી-દશેરાના તહેવાર દરમિયાન ગ્રાહકો મીઠાઇ-ફરસાણ-ડ્રાયફ્રુટસ તેમજ અન્ય ગિફ્ટસની ખરીદી કરતા હોય છે. જેમાં ઘણી વખત તેમને મીઠાઇ-ફરસાણ-ડ્રાયફ્રુટસની ખરીદીના વજનમાં પણ છેતરવામાં આવતા હોય છે. આવા બનાવો ન બને અને ગ્રાહકો પણ પોતાના અધિકારોથી જાગૃત થાય અને છેતરાતા અટકે તેવા ગ્રાહક સુરક્ષાના હેતુથી કાનૂની માપવિજ્ઞાન તંત્ર દ્વારા સમગ્ર રાજ્યની મીઠાઇ-ફરસાણ-ડ્રાયફ્રુટસ-ગિફ્ટ શોપ વગેરે પર તંત્રના કાયદા-નિયમોની જોગવાઇઓનું પાલન થાય તે માટે આ રાજ્યવ્યાપી ઝુંબેશ હાથ ધરવામાં આવી હતી.

આ તપાસણી દરમિયાન વજનમાં ઓછું આપીને ગ્રાહકોને છેતરવા, વજન કાંટાનું ફેરચકાસણી-મુદ્રાકન ન કરાવવું, ખરાઇ પ્રમાણપત્ર પ્રદર્શીત ન કરવું, પેકર રજીસ્ટ્રેશન ન કરવું વગેરે ગેરરીતિઓ સામે આવી છે. કાનૂની માપવિજ્ઞાન તંત્રએ આ રાજ્યવ્યાપી ઝુંબેશ દ્વારા તહેવારોના સમયગાળામાં ગ્રાહકોના હિતોનું રક્ષણ કરવા, વજનમાપમાં પારદર્શિતા જાળવવા તથા વેપારીઓ દ્વારા કાનૂની જોગવાઈઓનું પાલન સુનિશ્ચિત કરવા વિભાગે સઘન પ્રયાસો કર્યા હતા.કોઇ પણ વસ્તુના વજનમાં ઓછું આપવા તથા MRPથી વધુ ભાવ લેવા બાબતે ગ્રાહકો પોતાની ફરિયાદ માટે ગુજરાત રાજ્યની ટોલ-ફ્રી હેલ્પલાઇન 1800-233-0222 પર સંપર્ક કરી શકે છે. આ ઉપરાંત, ગ્રાહક ફરિયાદ અને માર્ગદર્શન માટે રાષ્ટ્રીય ગ્રાહક હેલ્પલાઇન 1915 (NCH) નો પણ સંપર્ક કરી શકાય છે તેમ, કાનૂની માપ વિજ્ઞાન તંત્ર દ્વારા જણાવાયું છે.

The post નવરાત્રી-દશેરાના તહેવારોમાં રાજ્યવ્યાપી ઝુંબેશ, 251 સામે ગુના appeared first on My Samachar.

રાજ્યમાં છેલ્લા કેટલાય દિવસોથી વીજકાપ કરીને વીજલોડ સેટ કરવામાં આવ્યો છે કારણ કે વીજળીની ખપત હોય માટે જ રાજ્યના મંત્રીઓ ઋષિકેશ પટેલ અને રાજ્ય મંત્રી કૌશિક વેકરીયાની અધ્યક્ષતામાં ઊર્જા અને પેટ્રોકેમિકલ્સ વિભાગ અને તમામ વીજ કંપનીઓના અગ્રણી અધિકારીઓ સાથે સમીક્ષા બેઠક યોજાઈ હતી. આ બેઠકમાં રાજ્યમાં વીજ માંગ વધવાના મુખ્ય કારણો, તાત્કાલિક નિવારણ માટે લેવાયેલાં પગલાં અને આગામી સમયની માંગને પહોંચી વળવા માટેના આયોજન અંગે વિસ્તૃત ચર્ચા કરવામાં આવી હતી.

સરકારના મતે વીજ માંગ વધવાનાં મુખ્ય કારણો:

• અલ નીનોની અસર:ચાલુ વર્ષે નબળા ચોમાસા બાદ પણ તાપમાન સતત ઊંચું રહેતાં કૂલિંગ લોડમાં મોટો વધારો નોંધાયો છે.
• કૃષિ ક્ષેત્રે વધુ માંગ:ઊભા પાકને સિંચાઈનું પાણી પૂરું પાડવા માટે ખેડૂતોને પૂરતાકલાકો વીજળી આપવામાં આવતાં કૃષિ લોડ વધ્યો છે, જેદૈનિકમહત્તમ૧૨૦૦૦ મેગાવોટ સુધીરહેછે.
• તહેવારોની મોસમ:નવરાત્રી અને આગામી દિવાળી તહેવારોને કારણે ઔદ્યોગિક માંગમાં પણ વધારો થયો છે.
• હાઇડ્રો અને પવન ઊર્જામાં ઘટાડો:રાજ્ય અને પાડોશી રાજ્યોમાં ઓછા વરસાદને કારણે હાઇડ્રો પાવર ઉત્પાદન ઘટ્યું છે, જે સામાન્ય રીતે ઓક્ટોબર-નવેમ્બરમાં મહત્તમ મળતું હોય છે. પવનની ગતિ ઓછી રહેવાને કારણે પવન ઊર્જાનું ઉત્પાદન પણ ઓછું થયું છે. પરિણામે સપ્ટેમ્બર અને ઓક્ટોબર માસ દરમિયાન રાજ્યની વીજ માંગ ગત વર્ષોની સરખામણીએ આશરે 12% (આશરે 4000 મેગાવોટ) સુધી વધી છે.

સાંજના 5 થી રાત્રે 11 વાગ્યા સુધી સૂર્યાસ્ત બાદ સોલાર ઉત્પાદન શૂન્ય થતાં અને પવન ઊર્જા અનિયમિત હોવાથી માંગને પહોંચી વળવા કોલસા અને ગેસ આધારિત પ્લાન્ટ્સમાંથી પુરવઠો આપવામા આવે છે. ગ્રીડની ફ્રીક્વન્સી અને સંતુલન જાળવવા રાજ્ય લોડ ડિસ્પેચ સેન્ટર (SLDC) અને વીજ વિતરણ કંપનીઓ સતત કાર્યરત છે.

The post સરકારને મતે રાજ્યમાં વીજમાંગ વધવાના આવા છે કારણો appeared first on My Samachar.

ખંભાળિયા નજીકના હાઈવે પર આજે વહેલી સવારે એક પરપ્રાંતિય ટેમ્પો ટ્રાવેલ્સ રોડ નીચે પલટી ખાઈ જતા તેમાં સવાર મુસાફરોને નાની-મોટી ઈજાઓ થવા પામી હતી. આ બનાવની સુત્રો દ્વારા જાહેર કરવામાં આવેલી વિગત મુજબ ખંભાળિયા – જામનગર હાઈવે પર અત્રેથી આશરે 15 કિલોમીટર દૂર જાખર ગામના પાટીયા પાસેથી આજરોજ સવારે આશરે 6 વાગ્યાના સમયે પસાર થઈ રહેલું ડી.ડી. 01 એક્સ 9021 નંબરનું ટેમ્પો ટ્રાવેલ્સ વાહન કોઈ કારણોસર રોડની નીચે ઉતરી, પલટી ખાઈ ગયું હતું.

આ વાહનમાં જઈ રહેલા આશરે 12 જેટલા મુસાફરોને નાની-મોટી ઇજાઓ થતાં ઇમરજન્સી 108 એમ્બ્યુલન્સ મારફતે સ્થાનિક સરકારી હોસ્પિટલમાં ખસેડવામાં આવ્યા હતા. યાત્રાળુઓ સાથેનો આ ટેમ્પો ટ્રાવેલ્સ અમદાવાદથી દ્વારકા તરફ જઈ રહ્યું હોવાનું જાહેર થયું છે. અકસ્માત બાદ ટેમ્પોમાં રહેલો સામાન ફાયર સ્ટાફ દ્વારા કાઢીને યાત્રાળુ પરિવારને સોંપવામાં આવ્યો હતો. ફાયર ટીમ અને 108 ની તાત્કાલિક કામગીરીથી સદભાગ્યે કોઈ મોટી જાનહાની થઈ ન હતી.(ફોટો કુંજન રાડિયા)

The post ખંભાળિયા નજીક ટ્રાવેલ્સ ટેમ્પોની પલટી: એક ડઝન મુસાફરો ઘવાયા appeared first on My Samachar.

નર્મદા જિલ્લામાં રાજપીપળા-રામગઢ (નવાગામ) રોડ ઉપર કરજણ નદી પરના મેજર બ્રિજના બાંધકામની નબળી ગુણવત્તા અંગે કોન્ટ્રાક્ટર સામે અસરકારક અને કડક પગલાં લેવામાં આવ્યા છે. મુખ્યમંત્રી ભૂપેન્દ્ર પટેલે રાજ્ય સરકારના માર્ગ મકાન વિભાગને આ બ્રિજના બાંધકામમાં સંકળાયેલા મેસર્સ રોયલ ઇન્ફ્રા એન્જિનિયરિંગ પ્રા. લિ., સુરત સામે ફોજદારી ફરિયાદ-FIR દાખલ કરવાના દિશાનિર્દેશો આપવાને પગલે રાજપીપળા પોલીસ સ્ટેશનમાં FIR કરવામાં આવી છે.

રાજપીપળા અને રામગઢ આસપાસના વિસ્તારો માટે ખૂબ જ અગત્યતા ધરાવતા આ બ્રિજની કામગીરી ગુણવત્તાયુક્ત ન હોવાથી આ પુલ જોખમી જણાયો હતો. બ્રિજના નિરીક્ષણ અને પરીક્ષણ બાદ આ પુલના ઇજારદાર સામે ફોજદારી ફરિયાદ દાખલ કરવામાં આવી છે. આ ઉપરાંત નબળી કામગીરી માટે સંબંધિત અધિકારી અને કર્મચારીઓ સામે પણ કડક પગલાં લેવાના આદેશો આપવામાં આવ્યાં છે.

માર્ગ અને મકાન વિભાગે  આ  બ્રિજનું કામ ૨૦૧૮-૨૦૧૯ માં ઇજારદાર મેસર્સ રોયલ ઇન્ફ્રા એન્જિનિયરિંગ પ્રા. લિ., સુરત ને સોંપેલું હતું. આ કામની ટેન્ડર રકમ રૂ. 10.71  કરોડ હતી અને કામગીરી શરૂ કરવાની તારીખ તા. 15/09/2018 હતી તથા કામગીરી ભૌતિક રીતે ખરેખર તારીખ 14/08/2020 ના રોજ પૂર્ણ થઈ હતી.વિભાગ દ્વારા બ્રિજની ચકાસણી દરમિયાન એક ફાઉન્ડેશન સેટલ થવાનું ધ્યાને આવેલ હતું. આ ક્ષતિ જણાતા ક્વોલિટી કંટ્રોલ પ્રભાગ દ્વારા સંપૂર્ણ બ્રિજનું પરીક્ષણ-નિરીક્ષણ કરવા જણાવ્યું હતું. તેમાં તપાસમાં બ્રિજના અન્ય ભાગોમાં પણ ક્ષતિ ધ્યાને આવી હતી. બ્રિજ વાહનવ્યવહાર માટે યોગ્ય અને સલામત ન હોવાનું જણાતાં તેના પર વાહનવ્યવહાર બંધ કરવાની ફરજ પણ પડી હતી.

મુખ્યમંત્રી ભૂપેન્દ્ર પટેલે આ ગંભીર ક્ષતિ ધ્યાને લઈને બ્રિજના બાંધકામ કરનારા કોન્ટ્રાક્ટર મેસર્સ રોયલ ઇન્ફ્રા એન્જિનિયરિંગ પ્રા. લિ. તથા તેના પ્રતિનિધિઓ સામે લાગુ પડતી કાયદાકીય જોગવાઈઓ અન્વયે ફોજદારી કાર્યવાહી કરવા સૂચનાઓ આપી હતી.આ ઉપરાંત, તેમણે બ્રિજના બાંધકામમાં થયેલી નબળી કામગીરી અને સંબંધિત બેદરકારી અંગે જવાબદાર અધિકારીઓ સામે પણ ગુજરાત રાજ્ય સેવા (શિસ્ત અને અપીલ) નિયમો, 1971 હેઠળ કાર્યવાહી હાથ ધરવા આદેશ આપ્યા છે.મુખ્યમંત્રી ભૂપેન્દ્ર પટેલે આ કાર્યવાહી દ્વારા સ્પષ્ટ સંદેશ આપ્યો છે કે, રાજ્ય સરકાર જાહેર બાંધકામોમાં ગુણવત્તા અને સલામતી સાથે કોઈ બાંધછોડ ચલાવી લેવા માગતી નથી. મહત્વનું છે કે મુખ્યમંત્રી અવાર નવાર કહે છે કે બાંધકામની ગુણવત્તામાં ગંભીર ક્ષતિઓ અને જવાબદારીમાં બેદરકારી સામે કાયદા અને નિયમો મુજબ કડક કાર્યવાહી કરવામાં આવશે આ કડક કાર્યવાહીથી તેમની એ વાત સાકાર થઈ છે.

The post બ્રિજની નબળી ગુણવત્તા સામે મુખ્યમંત્રીનો કડક અભિગમ: કોન્ટ્રાક્ટર સામે પોલીસ ફરિયાદ appeared first on My Samachar.

જામનગરના યુવા ઉદ્યોગપતિ અને જાણીતા વ્યવસાયિક મિતેશ અશોકભાઈ લાલે સ્વિટ્ઝર્લેન્ડની પ્રતિષ્ઠિત યુનિવર્સિટીમાંથી બિઝનેસ એડમિનિસ્ટ્રેશન (Business Administration)માં ડોક્ટરેટ (Ph.D./DBA) પી એચ ડી ની ડિગ્રી પ્રાપ્ત કરી નોંધપાત્ર સિદ્ધિ હાંસલ કરી છે.  જે શૈક્ષણિક ક્ષેત્રમાં સૌથી ઊંચી ડિગ્રી ગણાય છે તેમની આ સિદ્ધિથી પરિવારજનો, મિત્રો અને વ્યવસાયિક ક્ષેત્રમાં ખુશીની લાગણી ફેલાઈ છે અને અભિનંદનની વર્ષા થઈ રહી છે.

શિક્ષણ એ નિરંતર પ્રોસેસ છે, કોઇપણ ક્ષેત્ર માટે એકેડેમિક પધ્ધતિથી શિક્ષણ મેળવવું એ બિઝનેસ અપગ્રેડેશનમાં ખૂબ જ ઉપયોગમાં આવે છે તેમ જણાવી મિતેષ અશોકભાઈ લાલ એ ઉમેર્યું કે ઇન્સ્ટિટ્યૂટશનલ સ્ટડી અને બિઝનેસ દરમ્યાન જાણવા મળતી ચેલેન્જ,  એમ બંને પ્રકારે શીખતા રહેવું જોઈએ અને દરેક ક્ષેત્રમાં હમેશા  Learning is a continues process, એ વાસ્તવિકતા સાથે આગળ ધપવું જોઈએ, આ જ સિધ્ધાંતો ઉપર અવિરત પ્રગતિ કરતા ડૉ. મિતેષ લાલ  સ્વિટ્ઝર્લેન્ડની યુનિવર્સિટીમાં થી ph.d. કરવા માટે સતત 3 વર્ષ સુધી સંશોધન કરીને બિઝનેસ ઇન ઈન્ડિયા એન્ડ એબ્રોડ, એ અંગે પારંગત થયા , ત્યાર બાદ તેઓએ બીઝનેસ એડમિનિસ્ટ્રેશનમાં શીપીંગ વિષય ઉપરનો દળદાર થીસીસ લખ્યો, આ થીસીસ સ્વિટ્ઝર્લેન્ડની જાણીતી યુનિવર્સિટીએ માન્ય રાખીને આ ડિગ્રી એનાયત કરી છે.

શ્રીજી શિપિંગ, શ્રીજી પબ્લિકેશન, શ્રીજી ઇન્વેસ્ટ, શ્રીજી કન્સ્ટ્રક્શન, શ્રીજી ગ્રુપ્સ સહિતના ઔદ્યોગિક અને વ્યવસાયિક અનેક એકમોમાં ડાયરેક્ટર રહેલા મિતેશભાઈ, ડાઉન ટુ અર્થ રહીને ઊંચાઈઓ હાંસલ કરી છે. મિતભાષી, ધૈર્ય, સુઝકો એમ ત્રણેયના સંગમથી તેઓની ઝળહળતી અવિરત સિદ્ધિઓથી, લોકપ્રિયતા ખૂબ જ છે અને અનેક યુવાનોના તેઓ પ્રેરણા સ્ત્રોત બન્યા છે. ઓફિસ મેનેજમેન્ટ, ફિલ્ડ મેનેજમેન્ટ,એકાઉન્ટના વૈશ્વિક પેરામીટર વગેરે અંગે ઊંડા જ્ઞાનનો વારસો સાથે રાખી સમયની માંગ મુજબનું દરેક ઓપરેટિંગ કરવાના સમન્વયથી મિતેષ લાલની સફળતા આભને આંબે છે અને તેઓના ફોલોઅર્સ કહે છે વિનમ્રતા સાથેની મહાનતાએ દુર્લભ સમન્વય છે, જે અમે ડો મિતેષ લાલમાં જોઈએ છીએ

સહકાર ક્ષેત્રે પણ તેઓનું યોગદાન મહત્વનું છે, તેઓ જામનગરની જાણીતી કોમર્શિયલ કો ઓપરેટિવ બેન્કના વાઇસ ચેરમેન છે અને ફર્મ ડિસીઝનનાં આગ્રહી છે.શ્રીજી શોપિંગનો વ્યવસાય જામનગરથી માંડી ને વિદેશોમાં પણ વિસ્તર્યો છે ,જે માટે અશોકભાઈ લાલની અથાગ જહેમત છે, સાથે સાથે જીતુભાઈ લાલ પણ તમામ વહીવટી બાબતોને લગત ખૂબ જ મોટી જવાબદારી સુપેરે નિભાવે છે.

સ્ટાફ સાથે આત્મીયતા ધરાવતા અને વડીલોને હંમેશા સન્માન આપતા ડો મિતેષ લાલને આવા અનેક ગુણો વારસામાં છે તેમજ વ્યવસાય સાથે પણ તેમણે જાતે અનેક દૃષ્ટિકોણ અને સહજતા સાથે ગુણો વિકસાવ્યા છે જે અંગે નિષ્ણાત બિઝનેસ સમીક્ષકો કહે છે આટલું બધું જ એક જ વ્યક્તિમાં હોય તેવું રેર કિસ્સામાં જ બને છે.

ઉલ્લેખનીય છે કે ચેરિટેબલ ટ્રસ્ટોના માધ્યમથી અનેકવિધ સેવાકીય પ્રવૃતિઓ અવિરત કરવી એ લાલ પરિવારની વિશેષતા છે જેમાં મિતેષ લાલ ખૂબ જ સૂઝ બૂઝ સાથે કદમ મિલાવે છે. ઇઝ ઓફ ડુઈંગ, ઈઝ ઓફ લિવિંગ,ઇઝ ઓફ ટ્રેડ, મેઇક ઈન ઈન્ડિયા, આત્મનિર્ભરતા વગેરે પ્રિન્સીપલ સાથે ભારતને પ્રગતિ કરાવતા ચાલકબળોથી સ્થાનિક કક્ષાએ લોકો ઉત્પાદન અને વેંચાણ કરે તે બાબતના ડો મિતેષ લાલ હિમાયતી રહ્યા છે,ત્યારે આભને આંબતી સફળતાઓ માટે ડો મિતેષ લાલને અવિરત અભિનંદન મળી રહી છે.

The post Pride of Jamnagar: જામનગરના યુવા બિઝનેસમેનએ આંતરાષ્ટ્રીય ઓળખ મેળવી appeared first on My Samachar.

જામનગર શહેરની હદ વધવાની સાથે ચોતરફ વિકાસ પણ થઇ રહ્યો છે તેમાં ફ્લાયઓવર હોય ઓવરબ્રિજ હોય આરોગ્ય કેન્દ્રો હોય કે પછી મલ્ટી પર્પઝ ઓડીટોરીયમ હોય આમ લોકોને જે જરૂર છે તે તમામ માટે વહીવટી પાંખ અને સંગઠન પાંખ સતત જહેમત ઉઠાવી રહ્યા છે. આવો જ વધુ એક પ્રોજેક્ટ છે રંગમતિ રીવરફ્રન્ટનો મહત્વાકાંક્ષી પ્રોજેક્ટ રીવરફ્રન્ટ પ્રોજેક્ટ…..આ પ્રોજેક્ટને થોડા દિવસો પૂર્વે જ રાજ્ય સરકારે સૈદ્ધાંતિક મંજુરી આપ્યા બાદ ગતરોજ ગાંધીનગર ખાતે આ પ્રોજેક્ટને આગળ ધપાવવા બે મંત્રીઓની ઉપસ્થિતિમાં મહત્વની બેઠક યોજાઈ છે.

જામનગરને રિવરફ્રન્ટની ભવ્ય રોનક મળે તે માટે આ પ્રોજેક્ટને સૈદ્ધાંતિક મંજૂરી મળ્યા બાદ પ્રોજેક્ટને વેગ આપવા અને બજેટની ફાળવણી માટે ગતરોજ ગાંધીનગર સચિવાલય ખાતે રાજ્યના નાણાં મંત્રી કનુભાઈ દેસાઈ અને જામનગર ઉતરના ધારાસભ્ય અને રાજ્યના મંત્રી રીવાબા જાડેજાની ઉપસ્થિતિમાં જામનગર મ્યુ.કમિશ્નર દીપેશ કેડિયા અને સીટી ઈજનેર ભાવેશ જાનીએ આ અંગેનું એક વિસ્તૃત વિડીયો પ્રેઝન્ટેશન બન્ને મંત્રીઓ સમક્ષ રજુ કર્યું હતું.

જામનગરથી હાજર રહેલ બન્ને અધિકારીઓએ આ બેઠકમાં રંગમતી રિવરફ્રન્ટ પ્રોજેક્ટની વિસ્તૃત માહિતી રજૂ કરી બજેટ ફાળવણી સહિતની આગળની કાર્યવાહી માટે રજૂઆત કરી. આ અંગે નાણાંમંત્રીએ હકારાત્મક અભિગમ દાખવી જરૂરી કાર્યવાહી માટે બાંહેધરી આપી.અને આગામી સમયમાં આ રીવરફ્રન્ટ અંગેની ગ્રાન્ટ કેટલી હશે તેનો આંકડો જાહેર થશે મહત્વનું છે કે રંગમતી રિવરફ્રન્ટનું સપનું જો સાકાર થશે તો જામનગરના વિકાસને નવી દિશા મળશે અને શહેરની સુંદરતા, પર્યટન તથા નાગરિકોની સુવિધાઓમાં નોંધપાત્ર વધારો થશે તેમ માનવામાં આવી રહ્યું છે.

શું છે સમગ્ર પ્રોજેક્ટ..?

જામનગર મહાનગરપાલિકા દ્વારા શહેરની ઐતિહાસિક રંગમતી નદીના પુનર્જીવન માટે એક મહત્વાકાંક્ષી પ્રોજેક્ટ હાથ ધરવામાં આવ્યો છે. રંગમતી નદીના શહેરના મધ્યભાગમાંથી પસાર થતા 12.8 કિ.મી.ના પટ્ટાને “રંગમતી નદી પુનર્જીવન, પૂર નિયંત્રણ અને સંકલિત નદીકિનારા વિકાસ” પ્રોજેક્ટ હેઠળ વિકસાવવામાં આવશે.અને આ અંગેનો વિગતવાર દરેક મોટા પ્રોજેક્ટ શરુ કરતા પહેલા સરકારમાં ડીટેઇલ પ્રોજેક્ટ રીપોર્ટ સરકારમાં સોંપવામાં આવ્યો છે.

આ પ્રોજેક્ટ અંતર્ગત નદીની સફાઈ, ગંદા પાણીના નિકાલનું નિયમન, ચેનલનું પુનઃનિર્માણ અને કિનારા સ્થિરીકરણ સહિતના પૂર નિયંત્રણના કામો હાથ ધરવામાં આવશે. નદીમાં બારેમાસ પાણી જળવાઈ રહે અને પૂરના સ્તરનું અસરકારક સંચાલન થાય તે માટે ફુલાવી શકાય તેવા રબર ડેમ સ્થાપિત કરવામાં આવશે જો કે આ ટેકનોલોજીનો સફળ ઉપયોગ ગુજરાતમાં વડોદરા અને સુરત ખાતે પણ થયેલ છે તેમ જાણવા મળે છે.

નદીકિનારાના સૌંદર્યીકરણ અંતર્ગત સતત પ્રોમેનેડ અને ઘાટ, થીમ આધારિત બગીચાઓ, એમ્ફિથિયેટર, બાળકોના રમત વિસ્તારો, બોટિંગ સુવિધા અને રમતગમતના મેદાનો સહિતની આધુનિક જાહેર સુવિધાઓ વિકસાવવામાં આવશે, જે નાગરિકોને એક સ્વચ્છ અને જીવંત નદીકિનારો પ્રદાન કરશે. રણમલ તળાવ અને ખીજડિયા પક્ષી અભયારણ્યની નજીકના આ વિસ્તારમાં પર્યાવરણીય પુનઃસ્થાપન અને પક્ષી નિવાસસ્થાન સંવર્ધનનું પણ આયોજન કરવામાં આવેલ છે. જામનગર મહાનગરપાલિકાએ આ પ્રોજેક્ટ માટે વિગતવાર પ્રોજેક્ટ રિપોર્ટ (DPR) તૈયાર કરી, જરૂરી મંજૂરી માટે રાજ્ય સરકારને રજૂ કરેલ છે.

–રિવરફ્રન્ટ એટલે શું ..?

રિવરફ્રન્ટ એટલે નદીના કિનારે આવેલી જમીન કે વિકસિત વિસ્તાર, જે સામાન્ય રીતે મોટા શહેરોમાં લોકોના હરવા-ફરવા અને મનોરંજન માટે સુંદર બનાવવામાં આવે છે. જેમાં નદીની આસપાસ વૃક્ષો વાવીને પ્રદૂષણ ઘટાડવામાં મદદ મળે છે.નદીના કિનારે પાકા પાળા (Retaining Walls) બનાવવાથી શહેરમાં પૂર આવવાનું જોખમ ઘટે છે. રિવરફ્રન્ટ જોવા માટે દેશ-વિદેશથી લોકો આવે છે, જેનાથી સ્થાનિક વેપાર અને પ્રવાસનને મોટો વેગ મળે છે. નદીના કિનારે લાંબો વોક-વે બનાવવામાં આવે છે, જ્યાં લોકો સવારે અને સાંજે મોર્નિંગ વોક કે સાઇકલિંગ કરી શકે છે.નદીમાં બોટિંગ, સ્પીડ બોટ અને ક્રૂઝ જેવી સવારીની મજા માણી શકાય છે.

The post જામનગરના રંગમતી રિવરફ્રન્ટને સૈદ્ધાંતિક મંજૂરી મળ્યા બાદ ગાંધીનગર ખાતે મહત્વની બેઠક appeared first on My Samachar.

ભારતમાં આર્ટિફિશિયલ ઇન્ટેલિજન્સ અને ડેટા સેન્ટર માટે જરુરી સાધનોના ઉત્પાદન અને એસેમ્બલી માટે સૂચિત 50:50 સંયુક્ત સાહસની રૂપરેખા નક્કી કરતા એક બિન-બંધનકર્તા સમજૂતી કરાર પર અદાણી જુથની મુખ્ય કંપની અદાણી એન્ટરપ્રાઇઝિસ લિ. અને વૈશ્વિક એન્જિનિયરિંગ, સપ્લાય ચેઇન અને મેન્યુફેક્ચરિંગ કંપની જેબિલ ઇન્કએ હસ્તાક્ષર કર્યા છે.આ સમજૂતી કરાર આખરી કરારોના અમલીકરણ, જરૂરી મંજૂરીઓ મેળવવા અને સામાન્ય શરતોની આપૂર્તિને આધીન રહેશે. અગાઉ જૂન 2026 માં અદાણી ગ્રુપ અને જેબિલ દ્વારા ભારતમાં AI અને ડેટા સેન્ટર માળખું અને મેન્યુફેક્ચરિંગ ઇકોસિસ્ટમ વિકસાવવા માટે વ્યૂહાત્મક જોડાણ કરવાના ઈરાદાની જાહેરાત બાદ આ સમજૂતી કરાર કરવામાં આવ્યો છે.

અદાણી ગ્રુપના ચેરમેન ગૌતમ અદાણીએ કહ્યું હતું કે AI  ક્રાંતિ માટે માત્ર અલ્ગોરિધમ્સમાં નવીનતાઓથી વિશેષ કરવા માટે ઊર્જા, હાઇપરસ્કેલ ઇન્ફ્રાસ્ટ્રક્ચર, અદ્યતન કમ્પ્યુટિંગ અને ચોકસાઈપૂર્ણ ઉત્પાદન ભેગા મળી ‘ઇન્ટેલિજન્સ ઇકોનોમી’ને વેગ આપે. તેવા એક સંપૂર્ણ નવા ઔદ્યોગિક માળખાની જરૂર પડશે. તેમણે જણાવ્યું હતું કે અદાણી જુથનો દ્રષ્ટિકોણ AI માળખાને ઊર્જા પૂરી પાડવા અને તેનું સંચાલન કરવાથી લઈને કમ્પ્યુટિંગની આગામી પેઢીને આકાર આપતી મહત્વપૂર્ણ સિસ્ટમ્સના ઇજનેરી અને ઉત્પાદન સુધીની પ્રગતિને આવરી લેતી AI વેલ્યુ ચેઇનમાં આગળ વધવાનો છે. અદાણીએ જેબિલ સાથેનમ સૂચિત સંયુક્ત સાહસને આ ભવિષ્યના એક વ્યૂહાત્મક પગલું ગણાવતા કહ્યું હતું કે તે વૈશ્વિક AI અર્થતંત્રનો ભૌતિક પાયો  ઘડવામાં મદદ કરવા માટે જેબિલની વિશ્વ-સ્તરીય એન્જિનિયરિંગ અને ઉત્પાદન ક્ષમતાઓને અદાણીની ઊર્જા, ઇન્ફ્રાસ્ટ્રક્ચર અને ડેટા સેન્ટર્સ ક્ષેત્રની સંકલિત શક્તિઓ સાથે જોડે છે.

સૂચિત સંયુક્ત સાહસ ડેટા સેન્ટરોમાં ઉપયોગમાં લેવાતા AI રેક્સ, સર્વર્સ, સ્ટોરેજ અને નેટવર્કિંગ સાધનોનું ઉત્પાદન અને એસેમ્બલ કરશે. રેક્સમાં AI એપ્લિકેશન્સ અને અન્ય ડિજિટલ સેવાઓ માટે ઉચ્ચ-પ્રદર્શન કમ્પ્યુટિંગ સિસ્ટમ્સ હશે. તેના પોર્ટફોલિયોમાં પાવર ડિસ્ટ્રિબ્યુશન યુનિટ્સ, લિક્વિડ-કૂલિંગ સિસ્ટમ્સ અને ટ્રાન્સફોર્મર્સ સહિત આ સિસ્ટમોને પાવર અને કૂલિંગ કરવા માટે જરૂરી ઉપકરણોનો પણ સમાવેશ થશે.આ સાહસમાં મલ્ટી-ગીગાવોટ AI રેક મેન્યુફેક્ચરિંગ અપેક્ષિત ક્ષમતા અનેક ગીગાવોટની સંયુક્ત પાવર ક્ષમતા સાથે કમ્પ્યુટિંગ સિસ્ટમ્સને આધાર આપે છે. તે ઇન્સ્ટોલેશન અને કમિશનિંગ સેવાઓ પણ પૂરી પાડશે.

2030 સુધીમાં ભારતના ડેટા સેન્ટરની ક્ષમતા 5-8 ગીગાવોટ સુધી પહોંચવાનો અંદાજ છે, જે AI અપનાવવા, ક્લાઉડ વિસ્તરણ અને ડેટા સ્થાનિકીકરણ દ્વારા સંચાલિત છે. આ સાહસ સ્થાનિક માંગને પહોંચી વળવા અને નિકાસને ટેકો આપવા માટે ભારતમાં ઉત્પાદનનો આધાર પૂરો પાડશે. કંપનીઓ આગામી સાત વર્ષમાં AI કમ્પ્યુટિંગમાં રોકાણ દ્વારા સંચાલિત વૈશ્વિક બજારની 3 ટ્રિલિયન ડોલરથી વધુ હોવાનો અંદાજ છે. ડિજિટલ પર્સનલ ડેટા સંરક્ષણ કાનૂન 2023 હેઠળ વ્યક્તિગત ડેટા સુરક્ષા માટે માળખું પૂરું પાડતી કાનૂની સુરક્ષા 2047 સુધી ડેટા સેન્ટરો માટે કેન્દ્રીય બજેટ 2026ટેક્સ હોલિડે દ્વારા પૂરક, સ્થાનિક ડેટા ઇન્ફ્રાસ્ટ્રક્ચરમાં રોકાણને ટેકો આપશે તેવી અપેક્ષા છે. 2035 સુધીમાં અદાણી જુથની 5 ગીગાવોટ ગ્રીન-એનર્જી-સંચાલિત, હાઇપરસ્કેલ AI-સજ્જ ડેટા સેન્ટર વિકસાવવાની 100 બિલિયન ડોલરની પ્રતિબદ્ધતા સાથે આ સાહસ સુસંગત છે. સૂચિત સાહસ માળખાગત સુવિધાઓ, ઊર્જા, લોજિસ્ટિક્સ અને ડેટા સેન્ટરોમાં અદાણીની હાજરી હાર્ડવેર ઉત્પાદન ઉમેરશે.

The post અદાણી એન્ટરપ્રાઇઝ અને જેબિલે ડેટા સેન્ટર હાર્ડવેર ક્ષેત્રમાં સંયુક્ત સાહસ માટે સમજૂતી કરાર પર હસ્તાક્ષર કર્યા appeared first on My Samachar.

ગુજરાતમાં Gujarat Clinical Establishments (Registration and Regulation) Act, 2021 લાગુ છે. ગુજરાત સરકારના આરોગ્ય વિભાગના પોર્ટલ મુજબ આ અધિનિયમ 13 સપ્ટેમ્બર, 2022થી અમલમાં આવ્યો હતો. આ કાયદાનો હેતુ ક્લિનિકલ સંસ્થાઓની નોંધણી અને નિયમન માટેની વ્યવસ્થા ઊભી કરવાનો છે. હોસ્પિટલ, ક્લિનિક, લેબોરેટરી અથવા અન્ય તબીબી સંસ્થા માટે કઈ જોગવાઈ લાગુ પડે છે તે તેની શ્રેણી અને કાયદામાં આપેલી વ્યાખ્યા પર આધારિત છે.

જેમાં,દવાખાના ,હોસ્પિટલ, લેબોરેટરી, હોમીયોપેથી, નેચરોપેથી, ક્લિનિક, પોલિકલિનિક વગેરેની નોંધણી જિલ્લા આરોગ્ય અધિકારી કચેરીમાં થાય છે નાગરિકો પણ ત્યાં પૂછી શકે છે કે આ કાયદા મુજબ ડોક્ટરોએ શું કરવાનું ફરજિયાત છે.? અને કેટલા દવાખાના નોંધાયા છે? કેમકે બે વરસથી માત્ર મુદ્ત વધારા સિવાય કોઈ જ ઠોસ કામ આ કાયદા હેઠળ થયું નથી  અને જ્યારે મુદ્ત વધે તો ગેઝેટ દ્વારા પ્રસિદ્ધિ કરવાની આ જ કાયદાની કલમ મુજબ જોગવાઈઓ છે છતાં માત્ર જાણ કરવામાં આવે છે તેમ નિષ્ણાતો એ જણાવ્યું છે

હોસ્પિટલમાં સુવિધા,ફી ના દર, લેબ ટેસ્ટના દર, દાખલ કરવાના દર, ક્યાં ક્યાં રોગની સારવાર?, દર્દીઓને કઈ કઈ સારવાર મળશે, ડૉક્ટરોના નામ ડિગ્રી અને રજિસ્ટ્રેશન નંબર, હોસ્પી-ક્લિનિક નોંધણીનંબર, હાઇજીન, હેલ્થ,સેનીટેશનનીસુવિધા, સ્ટાફની લાયકાત, સલામતી વ્યવસ્થા, મેડિકલ કાઉન્સિલ અને કમિશનના ક્યાં કાયદા મુજબ કઈ સારવાર પધ્ધતિ અમલમાં છે, દર્દી સાથેના સગા માટે સગવડતાઓ, હોસ્પિટલ ઇન્ડોર સુવિધાની વિગત વગેરે સંખ્યાબંધ વિગત સેટ નોંધણી કરાવવી ફરજિયાત છે તેમજ  બાંધકામ વિગત મંજૂરી વિગત ફાયર સેફ્ટી સ્ટ્રક્ચર સ્ટેબિલિટી હવા ઉજાસ સગવડતા ઇમરજન્સી એક્ઝિટ પાર્કિંગ, કિચન, પેન્ટ્રી, લોન્ડ્રી, પીવાના અને નહાવાના પાણીની સુવિધા  વગેરે સહિત દરેક સ્થાનિક કાયદાઓના ચુસ્ત પાલન જરૂરી છે.

કેમકે અનેક સ્થળોએ પાર્કિગમાં કઈક બીજું હોય છે,સીડી સાંકડી હોય છે,ઇન્ડોર જાણે પ્લાય પાર્ટિશન, પાણીની અપુરતી સુવિધા, મચ્છર  માખી ત્રાસ, સ્વચ્છતા અભાવ વગેરે અનેક બાબતો સાથે ફી દરના બોર્ડ એન્ટ્રીમાં જોઈએ તેના બદલે મોટાભાગે જોવા નથી મળતા તો કાયદાનો અર્થ શું રહે?? તેમ જાગૃત લોકો સંસ્થાઓ પૂછે છે જ્યારે  જિલ્લા અને શહેર આરોગ્ય  શાખાઓ પોતે  તો જાણે ક્લિનિકલ એસ્ટેબ્લિશમેન્ટની અમલવારી ભૂલી જઈને માત્ર પત્રકો બનાવવામાં જ વ્યસ્ત છે તેમ પણ અમુક શિક્ષિત લોકો ટકોર કરે છે

The post ગુજરાત ક્લિનિકલ એસ્ટેબ્લિશમેન્ટ અધિનિયમ, જામનગર અને દેવભૂમિ દ્વારકામાં સો ટકા નોંધણી કેમ નથી થઈ..? appeared first on My Samachar.

દેવભૂમિ દ્વારકા જિલ્લામાં ખંભાળિયા તાલુકાની ભાડથર જિલ્લા પંચાયતની પેટા ચૂંટણી માટે  યોજાઈ ગયેલા મતદાન બાદ આજરોજ જિલ્લા પંચાયત ભવનમાં મત ગણતરી કરવામાં આવી હતી. જેમાં મત ગણતરીના અંતે આમ આદમી પાર્ટીના ઉમેદવાર વીરુભાઈ કંડોરીયા તેમના ભાજપના હરીફ ઉમેદવાર માલતીબેન કંડોરીયા કરતા 3651 મતની જંગી લીડ મેળવીને વિજેતા બન્યા હતા.  દેવભૂમિ દ્વારકા જિલ્લા પંચાયતની 3, ભાડથર બેઠકના સદસ્ય ડો. પી.વી. કંડોરીયાના થોડા સમય પૂર્વે થયેલા અવસાનના કારણે ખાલી પડેલી આ બેઠક માટે રવિવારે ચૂંટણી પ્રક્રિયા હાથ ધરવામાં આવી હતી. જેમાં થયેલા મતદાન પૂર્વે છેલ્લા કેટલાક દિવસોથી ભારે રસાકસી અને ખેંચતાણભર્યો માહોલ સર્જાયો હતો.

ખંભાળિયા તાલુકાની ભાડથર બેઠક પર ભાજપ, કોંગ્રેસ અને આમ આદમી પાર્ટી એમ કુલ 3 ઉમેદવારો મેદાનમાં રહ્યા હતા.ખૂબ જ રસાકસીભરી અને ત્રિપાંખિયા જંગવારી ભાડથર બેઠકની ચૂંટણી ખૂબ જ પ્રતિષ્ઠાના જંગ સમાન બની રહી હતી. જે માટે ભાજપ અને આમ આદમી પાર્ટીના નેતાઓના ધાડા મેદાનમાં ઊતરી આવ્યા હતા. આજરોજ સવારથી અહીંની જિલ્લા પંચાયત કચેરીમાં નાયબ જિલ્લા વિકાસ અધિકારીની ચેમ્બર ખાતે યોજાયેલી મત ગણતરીમાં પૂરતા બંદોબસ્ત સાથે શાંતિપૂર્ણ રીતે મત ગણતરી કરવામાં આવી હતી.

મહત્વની બાબતો એ છે કે આ મત ગણતરી પ્રક્રિયાના પ્રારંભથી જ આમ આદમી પાર્ટીના ઉમેદવાર વીરાભાઈ કારાભાઈ કંડોરીયા તેમના મહત્વના પ્રતિસ્પર્ધી ભાજપના માલતીબેન પરબતભાઈ કંડોરીયાથી સતત આગળ ચાલ્યા હતા. સાત રાઉન્ડમાં યોજાયેલી મત ગણતરીના અંતે આપના વિરુભાઈ કંડોરીયાને 7146 મત, જ્યારે ભાજપના માલતીબેન કંડોરીયાને 3495 મત મળ્યા હતા. જ્યારે કોંગ્રેસના ઉમેદવાર આલાભાઈ ફોગાભાઈ પિંડારિયા અને માત્ર 521 મત મળ્યા હતા. આ ઉપરાંત “નોટા”માં પણ 99 મત પડ્યા હતા.

આ મત ગણતરીમાં મહત્વની બાબત એ છે કે જીતનો દાવો કરતાં ભાજપ દ્વારા તેમના ઉમેદવારને મળેલા મત કરતા “આપ”ના ઉમેદવારની લીડ વધુ બની રહી હતી. વિજેતા ઉમેદવારના મિત્રો, ટેકેદારો સાથેનું ભવ્ય વિજય સરઘસ નીકળ્યું હતું. જેમાં મોટી સંખ્યામાં ગ્રામજનો જોડાયા હતા. વિજેતા ઉમેદવાર વીરુભાઈ કંડોરીયાને “આપ”ના પ્રદેશ પ્રમુખ ઈસુદાન ગઢવી, ગોપાલ ઈટાલીયા વિગેરે દ્વારા શુભેચ્છાઓ પાઠવવામાં આવી હતી.

ચર્ચાતી વિગત મુજબ હાલ દેવભૂમિ દ્વારકા જિલ્લામાં ખૂબ જ નહીવત વરસાદના કારણે ખાસ કરીને ખેડૂતોની સ્થિતિ વિકટ છે. ત્યારે સરકાર દ્વારા પૂરતા પગલાં લેવાના ન આવ્યા હોવાના આક્ષેપો સાથે ગ્રામજનોએ સત્તા પરિવર્તન ઈચ્છતા “આપ”ના ઉમેદવારને વિજેતા બનાવ્યા છે.આજના આ અણધાર્યા પરિણામોથી સ્થાનિક રાજકારણમાં ભારે ચર્ચા જાગી છે. સાથે સાથે ભાજપમાં પણ સોંપો પડી ગયો છે. (ફોટો: કુંજન રાડિયા)

The post ખંભાળિયાની ભાડથર બેઠક પર સત્તા પલટો: “આપ” ને સાથ આપતા મતદારો appeared first on My Samachar.